00ماكان له داعي00

من طرف سمو الاحساس الخميس مارس 13, 2008 4:55 pm

جرحت قلب الغرام وزدت في عنادك
تبغي الصراحه ترا ماكان له داعي

من أربع شهور كثر الصد وش فادك
ماغير حرضت طول الليل لخضاعي

طيرت الأشواق من مرفاك وبلادك
وذبلت رسايلك ما جاني بها ساعي

يا زين تتوقع أن اللي حصل زادك
بالعكس مازادك إلا زاد في أوجاعي

اللي محيرني أنك في الزعل عادك
للشك وهرجة الواشين تنصاعي

ليكون شي في بالك صاير مرادك
أخاف قاعد تفكر تلوي اذراعي

هذا ولا الحلم سولفها على رقادك
وشلون تبغي تسويها وأنا واعي

لو دمعتك سولفت لكبود حسادك
كان الرعيه تقيم قيمة الراعي

من أربع شهور و انته مطول عنادك
اسمع ترا صدق مال اللي حصل داعي

كلمــات الشيخ :حمدان بمحمد بن راشد آل مكتوم

غناء : محمد عبده